Եվրոպայի խորհրդի եվրոպական երիտասարդական հիմնադրամի աջակցությամբ «Ապագայի մանդատ» երիտասարդական հասարակական կազմակերպությունը ԵՊՀ շրջանավարտների և կարիերայի կենտրոնի հետ իրականացնում է «Երիտասարդական ներառման խթանում՝ զբաղվածության և մասնակցության միջոցով» խորագրով ծրագիրը:
Ծրագրի նպատակն է չեզոքացնել խոցելի երիտասարդների (տեղահանված անձինք, փախստականներ, սոցիալապես խոցելի և այլն) սոցիալական մեկուսացումը՝ նպաստելով նրանց զբաղվածության, տնտեսական և քաղաքացիական մասնակցությանը:
Ծրագրի կարևոր փուլերից մեկն օրերս տեղի է ունեցել Ծաղկաձորում կայացած եռօրյա սեմինարի շրջանակում։ Երիտասարդական ոլորտի փորձագետ Թամարա Թորոսյանի խոսքով՝ ծրագրի բոլոր բաղադրիչները կարևոր են երիտասարդների կարիերայի աջակցման և աշխատաշուկայում ինտեգրման տեսանկյունից. «Այս 3 հագեցած օրերի ընթացքում արցախցի երիտասարդները ծանոթացել են երիտասարդական մասնակցությանը և աշխատանքին, որոնք հանդիսանում են երիտասարդական քաղաքականության առաջնահերթություններ՝ տեղական և միջազգային մակարդակներում: Հաջորդ 2 փուլերը կամրացնեն մասնակիցների տեսական և գործնական գիտելիքները, ինչը լավ հիմք կհանդիսանա հետագա կարիերայի աջակցման գործում»։
Սեմինարի ընթացքում մասնակիցները ծանոթացել են «Ի՞նչ է առաջնորդությունը», «Երիտասարդական մասնակցություն. հայեցակարգ և մարտահրավերներ», «Երիտասարդական աշխատանք և ներգրավվածություն» և այլ հետաքրքիր թեմաների: