Հարգելի՛ հայրենակիցներ, մեր պետության կայացման և զարգացման ճանապարհին կրթամշակութային ոլորտը հիմնաքարային նշանակություն ունի։ Կրթությունը, գիտությունը, մշակույթը և սպորտը գերակա այն ուղղություններն են, որոնցում իրականացված բարեփոխումները, առաջխաղացումն ու ձեռքբերումները պետք է դրական փոփոխություն մտցնեն յուրաքանչյուր քաղաքացու կյանքում։ Միայն կրթված հասարակությունը կարող է հաղորդակից լինել ժամանակակից զարգացումներին, դիմակայել նոր մարտահրավերներին, ունենալ իրավագիտակցության բարձր մակարդակ։

Մեր խնդիրն է, որ յուրաքանչյուր երեխա լիարժեք իրացնի կրթություն ստանալու իր իրավունքը, ձեռք բերի համապարփակ գիտելիքներ, դառնա օրինապահ քաղաքացի և հանրության գիտակից մասնիկ։ Այն պետությունը, որն ունի կենսունակ գիտություն, տարբեր ոլորտներում նոր հայտնագործությունների շարունակական շղթա, վստահաբար զարգացման և ամուր հիմքերի ստեղծման ճանապարհին է։ Մենք մեր գիտնականների վստահելի աջակիցն ենք, ամուր հենարանը, գիտական կյանքում կայանալու երաշխավորը։

ԿԳՄՍ նախարարության առաջնային խնդիրներից է նաև պահպանել հազարամյա հայ մշակույթը, աջակցել նոր արժեքների ստեղծմանը, արժևորել և հանրահռչակել դրանք թե՛ Հայաստանում, թե մեր երկրից դուրս։ Մեր մշակույթի պահպանումն ու գնահատումը յուրաքանչյուր գիտակից քաղաքացու պարտքն է, և այդ գործում էլ պետությունը քաղաքացու կողքին է՝ որպես գլխավոր պատասխանատու։ Նախարարության առաջնահերթություններից մեկն է նաև սպորտի ոլորտը։ Մեր խնդիրն է աշխարհի տարբեր մրցասպարեզներում ներկայանալ պատրաստված ու ուժեղ մարզիկներով և վերադառնալ հաղթանակով՝ այդ կերպ ճանաչելի դարձնելով Հայաստանի Հանրապետությունը։

Սիրելի՛ քաղաքացիներ, ԿԳՄՍ նախարարությունն իր ամբողջ կազմով ջանասիրաբար և ամենայն պատասխանատվությամբ հետպատերազմական այս դժվարին օրերին էլ կատարելու է իր պարտքը, այն է՝ ամուր պահել պետության հիմքերը, նպաստել կրթամշակութային կյանքի զարգացմանը, գիտական ոլորտում նոր ձեռքբերումներին և առաջընթացին, սպորտում՝ շարունակական հաղթանակներին։

Ծառայում եմ Հայաստանի Հանրապետությանը։