Հ Ր Ա Վ Ե Ր
Հայաստանի Հանրապետության 2021 թվականի պետական բյուջեի` «1146.Հանրակրթության» ծրագրի «12008.Նախադպրոցական այլընտրանքային ծախսաարդյունավետ մոդելների ներդրում» միջոցառման շրջանակում դրամաշնորհի հատկացման մրցույթի
Ընդհանուր դրույթներ
- Հայաստանի Հանրապետության 2021 թվականի պետական բյուջեի` «1146.Հանրակրթության» ծրագրի «12008.Նախադպրոցական այլընտրանքային ծախսաարդյունավետ մոդելների ներդրում» միջոցառման շրջանակում դրամաշնորհի հատկացման մրցույթի հրավերը (այսուհետ՝ Հրավեր) տրամադրվում է ի լրումն մրցույթի մասին ՀՀ Կրթության, գիտության, մշակույթի և սպորտի նախարարության պաշտոնական կայքէջի «Տեղեկատվություն» բաժնի «Հայտարարություններ» ենթաբաժնում հրապարակված հայտարարության:
- Սույն մրցույթի արդյունքում դրամաշնորհ ստացող կառույցը որոշվում է ՀՀ կառավարության 2003 թվականի դեկտեմբերի 24-ի «Հայաստանի Հանրապետության պետական բյուջեից իրավաբանական անձանց սուբսիդիաների և դրամաշնորհների հատկացման կարգը հաստատելու մասին» N1937-Ն որոշմամբ սահմանված ընթացակարգերի և պայմանների հիման վրա:
Մրցույթի նպատակը և մասնակիցներ
- Մրցույթի նպատակն է ձևավորել նախադպրոցական այլընտրանքային կրթական հաստատություններ (համաձայն Կրթության, գիտության, մշակույթի և սպորտի նախարարի 2021 թվականի հունվարի 26-ի N 20-Ն հրամանով հաստատված «Նախադպրոցական կրթության այլընտրանքային, ծախսարդյունավետ մոդելների և դրանց ներդրման կարգի»), որոնք հնարավորություն կընձեռեն մեծացնել նախադպրոցական ծառայություններում ընդգրկված երեխաների թիվը:
- Մրցույթի անցկացման արդյունքում նախատեսվում է, որ ընտրված համայնքում (բնակավայրում) գտնվող որևէ կառույցում (բնակելի, կրթամշակութային, սպորտային, համայնքային) դրամաշնորհի միջոցներով կստեղծվեն նախադպրոցական կրթական ծառայություններ իրականացնելու համար համապատասխան պայմաններ:
- Մրցույթին մասնակցելու համար կարող են դիմել այն համայնքները (բնակավայրերը) որոնցում նախադպրոցական կրթական որևէ ծառայություն չի մատուցվում:
- Դրամաշնորհի առավելագույն մեծությունը՝ յոթ միլիոն ութ հարյուր քսանչորս հազար ՀՀ դրամ:
- Միջոցառումների իրականացման ժամանակահատվածը` 2021 թ. հունիս-դեկտեմբեր:
Հայտեր լրացնելը և ներկայացնելը
Մրցույթին մասնակցելու համար ներկայացվում է.
- դիմում համայնքի ղեկավարի կողմից,
- հրավերի հայտ (Հավելված 1-ով սահմանված ձևով),
- հայտատու կառույցի ՀՀ իրավաբանական անձանց պետական ռեգիստրում գրանցման վկայականի պատճենը,
- Կրթության, գիտության, մշակույթի և սպորտի նախարարի 2021 թվականի հունվարի 26-ի N 20-Ն հրամանով սահմանված մոդելներից որևէ մեկի ընտրության և ներդրման ծրագիրը (Հավելված 1.2-ով սահմանված ձևաչափով),
- տեղեկատվություն համայնքում (բնակավայրում) նախադպրոցահասակ երեխաների թվի վերաբերյալ,
- տեղեկատվություն նախադպրոցական կրթական ծառայության մատուցման համար նախատեսվող շինության շենքային վիճակի մասին,
- տեղեկատվություն համայնքի (բնակավայրի) բնակչության թվի, ազգային պատկանելության, աղքատության և գործազրկության մակարդակի մասին,
- համայնքի ավագանու որոշումը՝ մրցույթին Հրավերով նախատեսված պայմաններով մասնակցելու վերաբերյալ,
9. Հրավերի 8-րդ կետով նախատեսված պարտադիր փաստաթղթերից բացի՝ հայտատուն իր հայեցողությամբ կարող է ներկայացնել Ծրագրին առնչվող այլ փաստաթղթեր, նյութեր:
10. Հայտը ներկայացվում է հայերեն` սոսնձված, կնքված և ստորագրված ծրարով: Ծրարում ներառված փաստաթղթերը պետք է կազմված լինեն բնօրինակից և թվով յոթ կրկնօրինակից, որոնց վրա համապատասխանաբար գրվում են «բնօրինակ» և «կրկնօրինակ» բառերը:
11. Հայտերը (ներառյալ բոլոր փաստաթղթերը) ներկայացվում են Կրթության, գիտության, մշակույթի և սպորտի նախարարություն հետևյալ հասցեով. Երևան, 0010, Վ.Սարգսյանի 3, ՀՀ կառավարության 2-րդ տուն, 5-րդ հարկ, 501 սենյակ, հանրակրթության վարչության՝ մինչև 2021 թվականի հուլիսի 8-ը:
12. Մրցույթը կանցկացվի համաձայն Հավելված 2-ով սահմանված Կանոնակարգի: