Փետրվարի 12-14-ը Աշոցքում կայացել է դահուկավազքի Հայաստանի առաջնության երկրորդ փուլը, որին մասնակցել է 33 մարզիկ-մարզուհի (22 տղա, 11 աղջիկ): Մեդալներ են խաղարկվել դասական և ազատ ոճերի տղամարդկանց 10 և կանանց 5 կմ մրցատարածություններում, ինչպես նաև արագավազքում: Ըստ մրցաձևերի մեդալակիր են դարձել հետևյալ մարզիկները.
10 կմ դասական ոճ, տղամարդիկ
- Պողոսյան Թադևոս (Աշոցք) - 33։21․4
- Ոսկանյան Սպարտակ (Աշոցք) - 36։00․1
- Փանոյան Հրաչյա (Վանաձոր) - 40։39․6
10 կմ ազատ ոճ, տղամարդիկ
- Պողոսյան Թադևոս (Աշոցք) - 35։56․6
- Ոսկանյան Սպարտակ (Աշոցք) - 37։24․2
- Փանոյան Հրաչյա (Վանաձոր) - 38։22․5
5 կմ դասական ոճ, կանայք
- Գալստյան Կատյա (Աշոցք) - 16։21․9
- Մխիթարյան Աննա (Գյումրի) - 21։55․3
- Ավետիսյան Վարսենիկ (Գյումրի) - 22։16․3
5 կմ ազատ ոճ, կանայք
- Գալստյան Կատյա (Աշոցք) - 16։03․7
- Մխիթարյան Աննա (Գյումրի) - 19։28․4
- Մուրադյան Անգելինա (Աշոցք) - 19։37․3
Արագավազք 1.4 կմ դասական ոճ, տղամարդիկ
- Պողոսյան Թադևոս (Աշոցք)
- Ոսկանյան Սպարտակ (Աշոցք)
- Փանոյան Հրաչյա (Վանաձոր)
Արագավազք 1.4 կմ դասական ոճ, կանայք
- Գալստյան Կատյա (Աշոցք)
- Մխիթարյան Աննա (Գյումրի)
- Մուրադյան Անգելինա (Աշոցք)
Առաջնության երկու փուլերի արդյունքներով (առաջին փուլի արդյունքները՝ այս հղմամբ) 4 տղա և 2 աղջիկ հնարավորություն են ստացել մասնակցելու աշխարհի առաջնությանը: Փետրվարի 23-ից մարտի 7-ը Օբերստդորֆում (Գերմանիա) կայանալիք առաջնությանը Հայաստանը կներկայացնեն Միքայել Միքայելյանը, Թադևոս Պողոսյանը, Սպարտակ Ոսկանյանը, Հրաչյա Փանոյանը, Կատյա Գալստյանը և Աննա Մխիթարյանը:
Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանի խոսքով՝ առաջնության արդյունքները մտորելու տեղ են տալիս. «Առաջնությունը ցույց տվեց, որ կան մարզիկներ, որոնք շատ բարձր պատրաստավածություն ունեն և կան մարզիկներ, որոնք բավականին զիջում են առաջատարներին: Արդյունքների առումով՝ վերլուծելու, հետևություններ անելու տեղ ունենք, առաջիկայում ֆեդերացիայում կլինեն համապատասխան քննարկումներ: Բացի այդ, ինչպես առաջին փուլում, այս անգամ ևս կար ձյան սակավության խնդիր: Արդեն երկրորդ անգամ Հայաստանի առաջնությունից առաջ ֆեդերացիան ստիպված ուսումնամարզական հավաք է կազմակերպում Վանաձորի մասնակիցների համար, որպեսզի նրանք կարողանան պատշաճ պատրաստվել Հայաստանի առաջնությանը»:
Հայաստանի դահուկային սպորտի ֆեդերացիան նախատեսում է նաև առաջիկայում դահուկավազքի կիսամարաթոն անցկացնել` Աշոցք-Արփի ուղով, որն իր տեսակով առաջինը կլինի: «Մտադիր ենք կիսամարաթոնն անցկացնել մարտի 8-ին: Փորձելու ենք ամեն ինչ անել, որ մարաթոնը կայանա, բայց, ցավոք, եղանակային պայմաններին շատ բան է կախված: Այս տարի եղանակը տաք է, և ձյունն արագ է հալչում»,- ասել է Գագիկ Սարգսյանը:
Հայաստանի դահուկային սպորտի ֆեդերացիայի գլխավոր քարտուղարի խոսքով՝ չնայած եղած դժվարություններին՝ Հայաստանն աստիճանաբար հավասար պայքար է մղում դահուկային թոփ-պետությունների հետ, ինչի վառ օրինակը վերջերս կայացած աշխարհի մինչև 23 տարեկանների առաջնությունում Միքայել Միքայելյանի գրանցած արդյունքն է. «Դահուկավազքի Մ-23 տարեկանների աշխարհի առաջնության ազատ ոճի 15 կմ մրցատարածությունում 30 պետությունից 71 մասնակցի հետ պայքարում Միքայել Միքայելյանը 36։17․10 արդյունքով գրավել է 8-րդ հորիզոնականը: Տարիներ առաջ նման արդյունքի մասին երազել իսկ հնարավոր չէր, իսկ այսօր հավասարը հավասարի պայքարում ենք դահուկային սպորտում առաջատար պետությունների հետ, որոնք միլիոնավոր եվրոներ են ներդնում նման արդյունքների համար: Հայաստանը՝ ի դեմս Միքայել Միքայելյանի, զիջել է աշխարհի հզոր դահուկային պետություններից ընդամենը 5-ի՝ Գերմանիայի, Նորվեգիայի, Ֆրանսիայի, Ռուսաստանի և Շվեդիայի ներկայացուցիչներին»,- խոսքը եզրափակել է Գագիկ Սարգսյանը:
