Այսօր՝ սեպտեմբերի 8-ին, Մոսկվայում ավարտվել է գրքի միջազգային ցուցահանդեսը։

Ի թիվս տասնյակ երկրների, հազարավոր հրատարակիչների, գրավաճառների, գրական գործակալների, գրողների, արվեստագետների ու, լրագրողների, ցուցահանդեսին առանձին տաղավարով մասնակցել է նաև ՀՀ ԿԳՄՍ նախարարության պատվիրակությունը։ Բոլոր ներկաները հնարավորություն են ունեցել կապեր հաստատել, գնել և վաճառելու ստեղծագործությունների հեղինակային իրավունքներ, ծանոթանալ գրահրատարակչական նորություններին:

ԿԳՄՍ նախարարության պատվիրակությանը միացել են նաև «Զանգակ», «Էդիթ պրինտ», «Բուկինիստ» հրատարակչությունները, ինչպես նաև Մոսկվայի «Armbook» գրախանութը։

Ցուցահանդեսի շրջանակում միջոցառումների սրահում տեղի է ունեցել հանդիպում հայ ժամանակակից գրողների՝ արձակագիր Լուսինե Հովհաննիսյանի և բանաստեղծ Կարեն Անտաշյանի հետ: Հանդիպումը վարել է գրականագետ Լիլիթ Մելիքսեթյանը: Գրողները, նախ, ներկայացրել են իրենց ստեղծագործությունների ռուսերեն հատվածական թարգմանությունները: Այնուհետև, միջոցառումը շարունակվել է քննարկման ձևաչափով։

Տաղավարում ներկայացվել են նաև վերջին երկու տարիներին Հայաստանում և արտերկրում հրատարակված գրքերը։

Հանդիպումների և քննարկումների ընթացքում ձեռք են բերվել պայմանավորվածություններ հայ դասական և ժամանակակից գրողների գործերն օտար լեզուներով, մասնավորապես, հայկական ժողովրդական հեքիաթները ռուսերեն թարգմանելու վերաբերյալ։