Ծրագրի մասին
Ծրագիրն ուղղված է աջակցելու երիտասարդներին մասնակցելու միջազգային տարբեր տեսակի միջոցառումներին, ներկայացնելու իրենց փորձը, աշխատությունները, ինչպես նաև ձեռք բերելու նոր գիտելինքներ, զարգացնելու իրենց կարողությունները, որոնք հետագայում կծառայեն Հայաստանում իրենք հասարակական և մասնագիտական աշխատանքների բարելավման համար:
Ծրագրով ՀՀ կրթության, գիտության, մշակույթի և սպորտի նախարարության կողմից ավիատոմսի ծախսի փոխհատուցում կարող են ստանալ 16-ից մինչև 30 (ներառյալ) տարեկան երիտասարդները կամ 16-ից մինչև 30 (ներառյալ) տարեկան երիտասարդներից կազմված մինչև հինգհոգանոց խմբի անդամները՝ հետևյալ միջոցառումներին մասնակցելու համար՝
- Միջազգային երիտասարդական ծրագրեր՝ ֆորումներ, հանդիպումներ, կլոր սեղաններ, սեմինարներ, դասընթացներ (թրեյնինգ), համաժողովներ, գագաթնաժողովներ, նիստեր,
- միջազգային գիտաժողովներ, գիտական ֆորում, կոնֆերանսներ, գիտական համաժողովներ, գիտական նստաշրջաններ,
- միջազգային գիտատեխնիկական մրցույթներ,
- միջազգային մշակութային մրցույթներ, փառատոներ, ցուցահանդեսներ,
- միջազգային ինտելեկտուալ մրցույթներ, այդ թվում՝ օլիմպիադաներ,
- միջազգային ստարտափ ծրագրեր:
Իրավական հիմքը՝ ՀՀ կրթության, գիտության, մշակույթի և սպորտի նախարարի 5 սեպտեմբերի 2019թ. N 614-Ա/2 հրամանով հաստատված կարգ
Ովքեր կարող են դիմել
Ծրագրի կարող են դիմել և ավիատոմսի ծախսի փոխհատուցում ստանալ 16-ից մինչև 30 (ներառյալ) տարեկան երիտասարդները կամ 16-ից մինչև 30 (ներառյալ) տարեկան երիտասարդներից կազմված մինչև 5 հոգանոց խմբի անդամները (այդ թվում՝ ՀՀ կրթության, գիտության, մշակույթի և սպորտի նախարարության կողմից ձևավորված պատվիրակությանը)։
Դիմելու կարգը
Ծրագրի շրջանակներում ավիատոմսի ծախսի փոխհատուցում ստանալու համար մեկնելուց առնվազն 14 աշխատանքային օր առաջ անհրաժեշտ է գրավոր դիմել ՀՀ կրթության, գիտության, մշակույթի և սպորտի նախարարություն և ներկայացնել հայտ։
Անհրաժեշտ փաստաթղթեր
Դիմումատուի գրավոր հայտադիմումը պետք է պարունակի հետևյալ փաստաթղթերը՝
- դիմում,
- անձը հաստատող փաստաթղթի պատճեն,
- միջոցառմանը մասնակցելու պաշտոնական հրավեր,
- հրավերի հայերեն թարգմանությունը՝ հաստատված Հայաստանի Հանրապետության արդարադատության նախարարության կողմից որակավորում ստացած թարգմանչի կողմից։
Ի լրումն վերոնշյալ փաստաթղթերի դիմումատուն ներկայացնում է նաև՝
«Միջազգային երիտասարդական ծրագրեր՝ ֆորումներ, հանդիպումներ, կլոր սեղաններ, սեմինարներ, դասընթացներ (թրեյնինգ), համաժողովներ, գագաթնաժողովներ, նիստեր» միջոցառումներին մասնակցության դեպքում՝
- հրավերում պետք է հստակ նշված լինի Հայաստանի Հանրապետությունում գրանցված այն հասարակական կազմակերպության անվանումը, որը մասնակիցը ներկայացնելու է տվյալ միջոցառմանը,
- երաշխավորագիր՝ տրված տվյալ երիտասարդական հասարակական կազմակերպության կողմից։
«Միջազգային գիտաժողովներ, գիտական ֆորում, կոնֆերանսներ, գիտական համաժողովներ, գիտական նստաշրջաններ» միջոցառումներին մասնակցության դեպքում՝
- հրավերում պետք է հստակ նշված լինեն մասնակցի զեկուցման թեման, զեկուցման ձևը (գրավոր, բանավոր, աբստրակտ, ներկայացում (պրեզենտացիա)),
- զեկուցման ամփոփումը (ռեզյումե) կամ զեկուցման սեղմագիր տարբերակը:
«Միջազգային գիտատեխնիկական մրցույթներ» միջոցառմանը մասնակցության դեպքում՝
- հրավերում պետք է հստակ նշված լինի ներկայացվող աշխատանքի անվանումը,
- տվյալ աշխատանքի նկատմամբ հայտատուի հեղինակությունը հավաստող փաստաթուղթ(եր)։
«Միջազգային մշակութային մրցույթներ, փառատոներ, ցուցահանդեսներ» միջոցառումներին մասնակցության դեպքում՝
- հրավերում պետք է հստակ նշված լինի ներկայացվելիք կատարումը կամ ստեղծագործությունը,
- տվյալ ստեղծագործության լուսանկարը կամ կատարման տեսագրությունը կամ ձայնագրությունը:
«Միջազգային ինտելեկտուալ մրցույթներ, այդ թվում՝ օլիմպիադաներ» միջոցառումներին մասնակցության դեպքում՝
- հրավերում պետք է հստակ նշված լինի Հայաստանի Հանրապետությունում գրանցված այն կազմակերպության անվանումը, որը մասնակիցը ներկայացնելու է տվյալ միջոցառմանը,
- երաշխավորագիր՝ տրված տվյալ կազմակերպության կողմից։
«Միջազգային ստարտափ ծրագրեր» միջոցառումներին մասնակցության դեպքում՝
- հրավերում պետք է հստակ նշված լինի ստարտափ ներկայացնող խմբի կամ անհատի կամ կազմակերպության անվանումը,
- ստարտափի թեման,
- ստարտափի ամփոփ նկարագրությունը:
ՀՀ կրթության, գիտության, մշակույթի և սպորտի նախարարության կողմից ձևավորված պատվիրակության անդամները ներկայացնում են միասնական հայտ՝ կազմված հետևյալ փաստաթղթերից՝
- դիմում՝ պատվիրակության անդամների կողմից,
- պատվիրակության անդամների անձը հաստատող փաստաթղթերի պատճենները,
- միջոցառմանը պատվիրակության մասնակցության հրավերը,
- ՀՀ ԿԳՄՍ նախարարի հրամանը՝ պատվիրակություն ձևավորելու և պատվիրակության կազմը հաստատելու մասին։
Ծրագրի վերջնաժամկետ /եթե առկա է/
Կոնտակտներ, խորհրդատվություն
ՀՀ կրթության, գիտության, մշակույթի և սպորտի նախարարություն
Երիտասարդական քաղաքականության, լրացուցիչ և շարունակական կրթության վարչություն
Հեռ.՝+(374) 010 59 96 42
Էլ. փոստ՝ narek.arakelyan@escs.am, https://escs.am/am/news/4961 ,https://escs.am/am/news/15003