Ռիոյի Օլիմպիական խաղերի, աշխարհի եռակի և Եվրոպայի հնգակի չեմպիոն Արթուր Ալեքսանյանը կպայքարի 32-րդ ամառային Օլիմպիական խաղերի չեմպիոնի կոչման համար:

Տոկիոյում ընթացող Օլիմպիական խաղերում Արթուր Ալեքսանյանը (97 կգ) պայքարը սկսել է 1/8 եզրափակչից և տոնելով 3 հաղթանակ՝ կարիերայում երկրորդ անգամ օլիմպիական ոսկե մեդալ նվաճելու հնարավորություն է ստացել: Մեկնարկային գոտեմարտում Ալեքսանյանը 4:1 հաշվով հաղթել է Ուզուր Ջուզուպբեկովին (Ղրղզստան), ապա 5:1 հաշվով առավելության է հասել ֆինն Արվի Սավոլայնենի նկատմամբ, իսկ կիսաեզրափակչում պարտության է մատնել Սարավի Մոհամադհադիին (Իրան)՝ 4:1:

Ոսկե մեդալի համար Արթուր Ալեքսանյանը գոտեմարտելու է ռուս Մուսա Եվլոևի հետ. եզրափակիչը կկայանա օգոստոսի 3-ին:

Այսօր մրցագորգ է դուրս եկել նաև Կարապետ Չալյանը (77 կգ): Նա առաջին գոտեմարտում հաղթել է ուզբեկ Ժալգասբայ Բերդիմուրատովին` 5:0, ապա 2:1 հաշվով առավելության է հասել ռուս Ալեքսանդր Չեխիրկինի նկատմամբ, իսկ կիսաեզրափակչում զիջել է Ակժոլ Մախմուդովին (Ղրղզստան)` 2:6: Օգոստոսի 3-ին Չալյանը կգոտեմարտի բրոնզե մեդալի համար: