Հայաստանի ազգային պոլիտեխնիկական համալսարանի ներկայացուցիչները մասնակցել են «Վիեննայի էներգետիկ ֆորում-2021»-ին (ՎԷՀ), որը հուլիսի 5-7-ն անցկացվել է առցանց ձևաչափով:
ՎԷՀ-ի նպատակն է նպաստել տարբեր ոլորտների ներկայացուցիչների և շահառուների երկխոսությանը՝ միտված կայուն էներգետիկայի բնագավառում բազմակողմանի զարգացմանը և արտադրական ներուժի մեծացմանը։ Առաջնորդվելով «Վայր, որտեղ գործողությունները հանդիպում են հավակնությունների» նշանաբանով՝ ֆորումն առաջին վիրտուալ նախագիծն է, որտեղ այլ ձևաչափով քննարկվում են էներգետիկ հիմնախնդիրները։ Այս տարվա վեհաժողովում ներգրավված էին շահագրգիռ կողմերն ու փորձագետները՝ էներգետիկայի ոլորտում կայուն զարգացմանը նպաստող առանցքային թեմաների ուսումնասիրման և քննարկման համար:
Համաժողովը բաղկացած էր երեք հիմնական փուլերից՝ լիագումար նիստ, քննարկումներ և հմտությունների զարգացման մաս: Լիագումար նիստի ընթացքում փորձագետները և երիտասարդության ներկայացուցիչները քննարկել են հմտությունների զարգացման և էներգետիկ ոլորտում բարենպաստ պայմանների ստեղծման վերաբերյալ հարցեր: Քննարկումների հատվածում անցկացվել են ինտերակտիվ, ոչ պաշտոնական քննարկումներ, իսկ հմտությունների զարգացման փուլում մասնակիցները ստացել են գործնական խորհուրդներ, ինչպես նաև ծանոթացել լավագույն փորձի օրինակների:
ՀԱՊՀ ուսանողները էներգետիկ ֆորումի շրջանակում ակտիվորեն մասնակցել են առցանց միջոցառումների և քննարկումների, ինչպես նաև աշխատանքային հանդիպումների, որոնց ընթացքում քննարկվել են ոլորտի առանցքային հարցեր, ներկայացվել նախագծեր և մինչև 2030 թվականը կայուն զարգացման նպատակներին հասնելու համար անհրաժեշտ գործնական քայլերը։
Ֆորումի փակման օրը Պոլիտեխնիկի ուսանողները ցուցադրել են հոլովակ, որը ներկայացնում էր Էներգետիկայի և էլեկտրատեխնիկայի ինստիտուտը և առցանց ցուցահանդեսի ձևաչափով շնորհանդես՝ ինստիտուտի լաբորատոր սարքավորումների վերաբերյալ։
Նշենք, որ տարին երկու անգամ Վիեննայի էներգետիկ համաժողովը կազմակերպում են Ավստրիայի եվրոպական և միջազգային գործերի դաշնային նախարարությունը, Ավստրիական զարգացման գործակալությունը, Միավորված ազգերի արդյունաբերական զարգացման կազմակերպությունը և Կիրառական համակարգային վերլուծության միջազգային ինստիտուտը: