Այսօր տեղի է ունեցել Անատոլ Ֆրանսի անվան ֆրանսիական կրթահամալիրի պաշտոնական վերաբացման արարողությունը:
Հանդիսավոր միջոցառմանը ներկա են եղել ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը, ՀՀ-ում Ֆրանսիայի արտակարգ և լիազոր դեսպան Ժոնաթան Լաքոտը, Ֆրանսիայի Եվրոպայի և Արտաքին գործերի նախարարությանը կից Արտերկրում ֆրանսիական կրթության գործակալության (ԱՖԿԳ) տնօրեն Օլիվիե Բրոշեն, դպրոցի աշակերտներ, ծնողական համայնքի ներկայացուցիչներ, ինչպես նաև այլ պատվավոր հյուրեր:
Ողջույնի խոսքում դեսպան Լաքոտը՝ ընդգծելով, որ կրթահամալիրի շենքի վերաբացմանը մասնակցում է հուզմունքով, շնորհակալություն է հայտնել ՀՀ կառավարությանը` դպրոցի շենքի տրամադրման և ՀՀ ԿԳՄՍ նախարարությանը` կրթահամալիրի ծրագրին աջակցելու համար:
«Մենք նախատեսել էինք նոր շենք տեղափոխվել 2021 թվականի սեպտեմբերին, սակայն շնորհիվ ներդրված ջանքերի՝ հաջողվել է աշխատանքներն ավարտել մայիսին` ամբողջապես համապատասխան մեր պահանջներին: Ես առանձնակի բարձր եմ գնահատում կատարվածը, քանի որ աշխատանքները տեղի են ունեցել Հայաստանի համար շատ բարդ ժամանակահատվածում` պայմանավորված համավարակով և հատկապես Լեռնային Ղարաբաղի պատերազմով»,- նշել է դեսպանը` վստահություն հայտնելով, որ սեպտեմբերից ֆրանսիական կրթահամալիրը կկարողանա հյուրընկալել ավելի շատ աշակերտների. լինեն նրանք ֆրանսիացիներ, այլ օտարերկրացիներ, թե հայաստանցիներ:
«Մենք այսօր ունենք ֆրանսիական կրթահամալիր, որը, ինչպես Շարլ Ազնավուրը կասեր, 100 տոկոս ֆրանսիական է, միաժամանակ՝ 100 տոկոս հայկական»,- իր խոսքն ամփոփել է Ժ. Լաքոտը` շնորհակալություն հայտնելով նաև այն ծնողներին, որոնք իրենց երեխաների կրթությունը վստահում են ֆրանսիական կրթահամալիրին:
ԿԳՄՍ նախարարի տեղակալ Արթուր Մարտիրոսյանը, կարևորելով ֆրանսիական կրթահամալիրի գործունեությունը, նշել է, որ Հայաստանում ֆրանսերենի նկատմամբ հետաքրքրությունը մեծանում է, և ԿԳՄՍ նախարարության կողմից տարվող աշխատանքներն այդ ուղղությամբ ընդլայնվում են:
«Կրթահամալիրի գոյությունն իրապես խորհրդանշական է և հայ-ֆրանսիական բարեկամության ամրապնդման ապացույց: Վստահ եմ, որ համագործակցությունը կլինի շարունակական և արդյունավետ, ինչպես նաև հիմք կհանդիսանա նոր նախաձեռնություններ իրականացնելու համար՝ ի նպաստ մեր երկու պետությունների զարգացմանը»,- նշել է ԿԳՄՍ նախարարի տեղակալը` երկկողմ հարաբերությունների շարունակական զարգացման համար շնորհակալություն հայտնելով բարեկամ Ֆրանսիային՝ ի դեմս արտակարգ և լիազոր դեսպան Ժոնաթան Լաքոտի:
«2020 թվականին կրթահամալիրին տրվել է լիցենզիա գրական հայերենով, միջնակարգ հանրակրթական ծրագրով գործունեություն իրականացնելու համար: Վստահ եմ, որ կրթահամալիրը հնարավորություն կունենա իրականացնելու նաև զարգացման նոր ծրագրեր՝ ուղղված կրթության որակի և արդյունավետության բարձրացմանը, ինչպես նաև կրթամշակութային տարբեր միջոցառումներ՝ ներգրավելով հանրապետության դպրոցների աշակերտներին և ուսուցիչներին: Հաշվի առնելով ֆրանսերենի ուսուցման առանձնահատկությունը՝ լիահույս եմ, որ միջնաժամկետ և երկարաժամկետ հատվածում կրթահամալիրը կիրականացնի նաև ծրագրային նոր նախաձեռնություններ՝ ուղղված Հայաստանի հանրակրթական դպրոցներում ֆրանսերեն դասավանդող ուսուցիչների կարողությունների շարունակական զարգացմանը»,- նշել է Արթուր Մարտիրոսյանը` Անատոլ Ֆրանսի անվան ֆրանսիական կրթահամալիրի տնօրինությանը և մանկավարժներին մաղթելով հաջողություններ:
Հյուրերը դպրոցի վերաբացումը խորհրդանշող կարմիր ժապավենը կտրելուց հետո դիտել են կրթահամալիրի սաների պատրաստած ներկայացումը, այնուհետև շրջել դպրոցում:
Արտերկրում ֆրանսիական կրթության գործակալության տնօրեն Օլիվիե Բրոշեն և «Անատոլ Ֆրանսի անվան ֆրանսիական կրթահամալիր» հիմնադրամի նախագահ Զառա Նազարյանը ստորագրել են համաձայնագիր` կրթահամալիրի հետագա գործունեության վերաբերյալ:
«Անատոլ Ֆրանսի անվան ֆրանսիական կրթահամալիր» հիմնադրամը գործում է 2007 թվականից և ՀՀ-ում գործող միակ հաստատությունն է, որն ունի Ֆրանսիայի Ազգային կրթության նախարարության կողմից տրված լիցենզիա, որը ճանաչված է Ֆրանսիայի ու Հայաստանի միջև կնքված միջպետական համաձայնագրով: Դպրոցում ուսուցումն իրականացվում է Ֆրանսիայի Հանրապետության կրթական ծրագրերին և կրթահամալիրի կանոնադրությանը համապատասխան:
Կրթական ծրագրերն իրականացվում են նախակրթարանի, տարրական, միջին և ավագ դպրոցների մակարդակներում: 2020 թվականին կրթահամալիրին տրվել է լիցենզիա՝ գրական հայերենով միջնակարգ հանրակրթական ծրագրով գործունեություն իրականացնելու համար: Դպրոցում այժմ գործում է 2 բաժին՝ ֆրանսիական և հայկական։ Ֆրանսիական բաժինն ապահովում է ամբողջական և համապարփակ կրթական ծրագիր՝ 2-18 տարեկան սովորողների համար։ Ֆրանսիական բաժնի աշակերտները ստանում են միջազգայնորեն ընդունված Բակալորեա դիպլոմը։ Հայկական բաժնում իրականացվում է ավագ դպրոցի կրթական ծրագիր։
Նշենք, որ 2019 թվականին «Անատոլ Ֆրանսի անվան ֆրանսիական դպրոց» հիմնադրամը վերանվանվել է «Անատոլ Ֆրանսի անվան ֆրանսիական կրթահամալիր» հիմնադրամի: 2020 թվականին ՀՀ կառավարության որոշմամբ նախկին N 16 դպրոցի շենքը հատկացվել է կրթահամալիրին՝ անհատույց օգտագործման իրավունքով: Դրանով ՀՀ կառավարությունն իր ներդրումն է ունեցել Հայաստան-Ֆրանսիա հարաբերությունների զարգացման գործում՝ իրականացնելով նաև Ֆրանկոֆոնիայի հանդեպ հանձնառությունը:
