- Ի՞նչ են գրքի միջազգային ցուցահանդեսները և ո՞րն է դրանց նպատակը
Գրքի միջազգային ցուցահանդեսները հարթակ են հրատարակչությունների, գրական գործակալությունների, թարգմանիչների, գրողների, նկարազարդողների, ձևավորողների և ոլորտի այլ մասնագետների համար: Ցուցահանդեսներում հայկական տաղավարները հնարավորություն են տալիս հայաստանյան հրատարակչություններին և գրական գործակալներին գնելու և վաճառելու գրողների աշխատանքների թարգմանության և օգտագործման գույքային իրավունքները:
ՀՀ ԿԳՄՍ նախարարության՝ գրատարածման, հայ գրականությունն արտերկրում ճանաչելի դարձնելու քաղաքականությունը, որն իրականացվում է նաև գրքի միջազգային հեղինակավոր ցուցահանդեսներին մեր երկրի մասնակցությամբ, միտված է խթանելու գրողների ստեղծագործական ներուժի դրսևորումը, գրական դաշտի օղակների հավասարաչափ զարգացումը, գրական-մշակութային ժառանգության պահպանումը, տարածումը և հանարհռչակումը, ոլորտում միջազգային համագործակցության համար նպաստավոր պայմանների ստեղծումը:
ՀՀ ԿԳՄՍ նախարարության աջակցությամբ Հայաստանը 2020 թվականին առանձին տաղավարով մասնակցելու է Լոնդոնի (մարտի 10-12), Լայպցիգի (մարտի 12-15), Բոլոնիայի (մարտի 30-ապրիլի 2), Մոսկվայի (սեպտեմբերի 2-6), Ֆրանկֆուրտի (հոկտեմբերի 14-18) գրքի միջազգային ցուցահանդեսներին, որոնց ընթացքում նախատեսվում են միջոցառումներ (բացառությամբ Լայպցիգի գրքի միջազգային ցուցահանդեսի):
ՀՀ ԿԳՄՍ նախարարությունը ցուցահանդես-տոնավաճառների ժամանակ արտասահմանյան հրատարակչություններին է ներկայացնում նաև «Հայ գրականությունը թարգմանություններում» դրամաշնորհային ծրագիրը, որով աջակցում է արտերկրի այն հրատարակչություններին, որոնք պատրաստակամ են իրենց երկրում օտար լեզվով հրատարակել հայ դասական և ժամանակակից գրականություն: Նշված ծրագրով 2019 թվականի ընթացքում աջակցություն է ստացել 16 գրքի հրատարակման հայտ՝ 12 լեզվով:
- Ի՞նչ է ակնկալվում այս մրցույթից
Հայաստանի տաղավարում տարվող աշխատանքներից բացի ՀՀ ԿԳՄՍ նախարարությունը ոլորտի շահառուների (գրող, թարգմանիչ, գրաքննադատ, նկարազարդող, ձևավորող, և այլք) ներգրավմամբ կազմակերպում է նաև շնորհանդեսներ, ընթերցումներ, քննարկումներ, աշխատարաններ, բանախոսություններ ցուցահանդեսների՝ այդ նպատակով առանձնացված սրահներում և դահլիճներում:
2019 թվականին նախարարությունը Լայպցիգի, Թեհրանի, Մոսկվայի և Ֆրանկֆուրտի գրքի միջազգային ցուցահանդեսներում նմանօրինակ տասը միջոցառում է կազմակերպել։
ՀՀ ԿԳՄՍ նախարարությունը 2020 թվականի գրքի միջազգային ցուցահանդեսներում ներկայացնելու համար ընդունում է միջոցառումների նախագծերի առաջարկներ՝ հայտեր (բացառությամբ Լայպցիգի գրքի միջազգային ցուցահանդեսի): Լավագույն ծրագրեր ներկայացրած մասնակիցները Հայաստանի պատվիրակության հետ կմասնակցեն գրքի ցուցահանդեսներին՝ միջոցառումներն իրականացնելու։ Մասնակցի ծախսերի և ծրագրի իրականացման ամբողջական կամ մասնակի ֆինանսավորումը կհոգա ՀՀ ԿԳՄՍ նախարարությունը։
Ներկայացված հայտերից լավագույններն ընտրելու է մասնագիտական հանձնաժողովը։
Հայտերը գնահատելիս որպես չափորոշիչներ հաշվի են առնվելու միջոցառման նորարարությունը, կարևորությունը, հիմնավորվածությունը, արդյունավետությունը, գրողի կամ կազմակերպության գործունությունը, մասնակցի՝ տվյալ ցուցահանդեսում հաղորդակցման լեզվի իմացությունը։
- Ովքե՞ր կարող են դիմել
Հայտեր կարող են ներկայացնել ՀՀ քաղաքացիություն ունեցող ֆիզիկական անձինք՝ ստեղծագործողները, կամ շահույթ չհետապնդող կազմակերպությունները, որոնք ծավալում են համապատասխան ոլորտային գործունեություն (գրական-մշակութային):
Հայտ չեն կարող ներկայացնել այն քաղաքացիները, որոնք օրենքով սահմանված կարգով չեն կարող բացակայել երկրից կամ տվյալ երկիր մուտք գործելու արգելք ունեն։
- Ի՞նչ է անհրաժեշտ ծրագրին դիմելու համար
Անհրաժեշտ է grakandramashnorh@gmail.com էլ. հասցեին ուղարկել.
- Հայտաձևը
- Մոտիվացիոն նամակ (մանրամասն հիմնավորել ծրագրի նորարարությունը, կարևորությունը, ընտրված թեմայի և նյութի առնչությունը ժամանակակից գրական գործընթացներին և միտումներին, միջոցառման ձևաչափի ընտրությունը)
- Ինքնակենսագրություն (ֆիզիկական անձինք) կամ տեղեկատվություն գործունեության մասին (կազմակերպությունները)
- Մասնակցի (մասնակիցների) անձնագր(եր)ի լուսապատճեն(ներ)ը։
- Լեզուների իմացությունը հավաստող փաստաթղերը (առկայության դեպքում)։
Այլ պայմաններ
Հայտը և դրան կցվող փաթեթը պետք է լինեն հայերեն: Անհրաժեշտության դեպքում ՀՀ ԿԳՄՍ նախարարությունը հայտատուից կարող է պահանջել նաև այլ փաստաթղթեր, նյութեր։ Թերի կամ կեղծ տեղեկություններ պարունակող հայտերը չեն դիտարկվի։
- Ժամանակացույց
Մրցույթի մեկնարկ` 10. 01. 2020:
Հայտերի ներկայացման վերջնաժամկետ`
- Լոնդոնի (մարտի 10-12) ցուցահանդեսի համար՝ 17. 01. 2020
- Բոլոնիայի (մարտի 30-ապրիլի 2) ցուցահանդեսի համար՝ 17. 01. 2020
- Մոսկվայի (սեպտեմբերի 2-6) ցուցահանդեսի համար՝ 16. 02. 2020
- Ֆրանկֆուրտի (հոկտեմբերի 14-18) ցուցահանդեսի համար՝ 01. 03. 2020
Մրցույթի արդյունքների հայտարարում`
- Լոնդոնի (մարտի 10-12) ցուցահանդեսի համար՝ 22. 01. 2020
- Բոլոնիայի (մարտի 30-ապրիլի 2) ցուցահանդեսի համար՝ 22. 01. 2020
- Մոսկվայի (սեպտեմբերի 2-6) ցուցահանդեսի համար՝ 08. 03. 2020
- Ֆրանկֆուրտի (հոկտեմբերի 14-18) ցուցահանդեսի համար՝ 31. 03. 2020
Հետադարձ կապ
Հայտաձևի լրացման, փաթեթի պատրաստման և մրցույթին առնչվող այլ հարցերով կարող եք կապ հաստատել հետևյալ հեռախոսահամարով 011 52 39 38:
ՀՀ ԿԳՄՍ նախարարության մշակութային ժառանգության և ժողովրդական արհեստների վարչություն: