11 մեդալ Եվրոպական խաղերից և 11 հարց մեր մարզիկներին
Բռնցքամարտիկ Արթուր Հովհաննիսյան. երկրորդ Եվրոպական խաղերում նվաճել է ոսկե մեդալ (49 կգ քաշային կարգ):
- Ո՞րն էր առաջին միտքը, որ ծագեց, երբ հասկացաք` հաղթել եք:
- Զգացի, որ վերջապես երազանքս ու նպատակս կատարվեց, և ինձ համար առաջ եկան նոր երազանքներ, նպատակներ:
- Ի՞նչ զգացողություն ունեցաք, երբ բարձրացվեց հայկական եռագույնը:
- Աննկարագրելի է, երբ առաջին տեղն ես զբաղեցնում, և մի ամբողջ բազմություն ոտքի է կանգնում, հարգում է քեզ և երկրիդ հիմնը:
- Դժվա՞ր է չեմպիոն լինել:
- Ճիշտ է, դժվար է չեմպիոն լինելը, բայց ավելի դժվար է չեմպիոն մնալը:
- Ամենապատասխանատու պահը Ձեր սպորտային կարիերայում:
- Ինձ թվում է, Եվրոպական խաղերի եզրափակչի մենամարտին տրամադրվելն էր ամենապատասխանատու, նաև` ամենակարևոր իրադարձությունն իմ կյանքում:
- Հաջորդ բարձունքը, որը կցանկանաք նվաճել:
- Հիմա ունենք աշխարհի առաջնություն, որից հետո` 2020 թվականին, Օլիմպիական խաղերն են… Նպատակներս պարզ են և հստակ: Փորձելու ենք ամեն ինչ անել, որպեսզի հաղթենք:
- Կարևորագույն հատկանիշը` չեմպիոն դառնալու ճանապարհին:
- Արդյունքների բարելավում, քրտնաջան աշխատանք և նոր երազանքներ իրականացնելու ձգտում:
- Որևէ մեկին նվիրո՞ւմ եք Ձեր հաղթանակը:
- Հաղթանակս ուզում եմ նվիրել ծնողներիս, մեր զինվորներին, ինչպես նաև մեր հայ ազգին:
- Ո՞վ կամ ի՞նչն է Ձեզ ոգեշնչում:
- Առաջ գնալու, հաղթելու ցանկությունը:
- Ի՞նչ կցանկանաք ասել պատանի մարզիկներին, որոնք դեռ բարձունքներ նվաճելու ճանապարհին են:
- Քրտնաջան պարապել, երբեք կանգ չառնել. եթե կա բարձունք, ուրեմն կա ճանապարհ` այդ բարձունքին հասնելու:
- Ի՞նչ կցանկանաք ասել մարզասերներին, որոնք այս ընթացքում հետևում էին Ձեր հաղթական ճանապարհին:
- Զինվել համբերությամբ և սպասել նորանոր հաղթանակների:
- Ո՞ւմ կցանկանաք շնորհակալություն հայտնել այս մեդալի համար:
- Իհարկե, իմ անձնական մարզիչներին` Ռուդիկ Մկրտչյանին և Կարեն Ղազարյանին, ովքեր մեծ ներդրում ունեն իմ հաղթանակի մեջ:
