ՀՀ ԱԺ կրթության, գիտության, մշակույթի, սփյուռքի, երիտասարդության եւ սպորտի հարցերի մշտական հանձնաժողովը ՀՀ 2020-2022 թվականների միջնաժամկետ ծախսային ծրագրի եւ 2020 թվականի բյուջետավորման հայտի նախնական տարբերակը քննարկելու նպատակով հուլիսի 12-ին ընդլայնված նիստ է գումարել, որին մասնակցել են ՀՀ կրթության, գիտության, մշակույթի եւ սպորտի նախարար Արայիկ Հարությունյանը, ինչպես նաեւ կրթության եւ գիտության ոլորտների պատասխանատուներ:

Նախարարի տեղեկացմամբ՝ գալիք տարում կրթության ոլորտին պետական բյուջեից նախատեսվել է հատկացնել 145 մլրդ 991 մլն դրամ, որն ընթացիկ տարվա հատկացումից ավելի է 18.9 մլրդ դրամով: Ավելացված գումարի մի մասն ուղղվելու է ուսուցիչների աշխատավարձերի 10 տոկոսով բարձրացմանը:

Նախարարությունը շարունակելու է իրականացնել սկսված ծրագրերը: Մասնավորապես, շարունակվելու է դպրոցների շենքային պայմանների բարելավումը. բացի հիմնանորոգման աշխատանքներից, մարզերի 22 փոքրաթիվ համայնքներում կատարվելու են դպրոցների վերակառուցման աշխատանքներ, եւ մոտ երկու տարուց Հայաստանի դպրոցներն այլ՝ ավելի բարեկարգ տեսք ու հնարավորություններ են ունենալու, վստահեցրել է նախարարը:

Առաջիկա տարիներին հանրապետության տարբեր մարզերում ավելացվելու է նախակրթական հաստատությունների թիվը:

Գալիք տարում կհեշտանա նաեւ ուսուցիչների տեղաշարժը համայնքից համայնք, քանի որ մի քանի անգամ ավելացվելու է այդ նպատակի համար հատկացված գումարը:

Նախատեսվում է խորհրդարանի քննարկմանն առաջարկել նախադպրոցական եւ բարձրագույն բուհական կրթության վերաբերյալ օրենքների նախագծեր, որոնց բացակայությունը կամ թերի լինելը բացասաբար է ազդում այդ բնագավառների աշխատանքի վրա: