Մայիսի 18-ը կարևոր ու խորհրդանշական օր է համաշխարհային մշակութային օրացույցում․ օրը նշանավորվել է՝ արժևորելով թանգարանների բացառիկ դերը՝ որպես մշակութային ժառանգության պահպանման, հանրահռչակման, կրթության և հանրային հիշողության ամրապնդման կարևորագույն կենտրոններ։
Մայիսի 16-ին թանգարանային համայնքը տոնել է «Թանգարանների գիշեր» համաեվրոպական միջոցառումը՝ «Թանգարանները միավորում են մասնատված աշխարհը» խորագրի ներքո: Այս տարի «Թանգարանների գիշեր» համաեվրոպական միջոցառմանը միացել է ՀՀ-ում գործող 116 թանգարան՝ պետական, համայնքային և մասնավոր․ թանգարաններն այդ օրը բաց են եղել ժամը 11:00-ից մինչև 24:00-ը և այցելուներին ընդունել են անվճար։
«Թանգարանային գիշեր» միջոցառման շրջանակում թանգարաններն ընդունել են ավելի քան 138.954 այցելու՝ առաջարկելով յուրահատուկ և բազմաբովանդակ մշակութային ծրագրեր։ Այցելուները հնարավորություն են ունեցել բացահայտելու թանգարանային հավաքածուները նոր ձևաչափով, մասնակցելու ինտերակտիվ միջոցառումների և վայելելու մշակութային հարուստ միջավայրը։ Միջոցառումների նպատակն էր խթանել հանրային հետաքրքրությունը մշակութային ժառանգության նկատմամբ, ամրապնդել թանգարանների և հանրության միջև կապը՝ ընդգծելով մշակույթի կարևորությունը համերաշխ և միասնական հասարակության կառուցման գործում։
