ՀՀ կրթության, գիտության, մշակույթի և սպորտի նախարարության «Թատերական շաբաթ» ծրագիրը շարունակվում է:
Գաբրիել Սունդուկյանի անվան ազգային ակադեմիական թատրոնը թատերական շաբաթվա շրջանակում հյուրընկալել է Երևանի Գարեգին Նժդեհի անվան թիվ 161 հիմնական դպրոցի 8 և 9-րդ դասարանի աշակերտների, ուսուցիչներին և ծնողներին։
ԿԳՄՍ նախարարի տեղակալ Դանիել Դանիելյանի ու թատրոնի տնօրեն Վարդան Մկրտչյանի ուղեկցությամբ նրանք շրջել են թատրոնում:
Աշակերտներին ներկայացվել են թատրոնի շենքի պատմական նշանակությունն ու գործունեությունը․ այցելուները հնարավորություն են ունեցել լինելու հետնաբեմում, հանդերձարանում, թատերական դեկորների պատրաստման արտադրամասում։ Երեխաները նաև հետևել են «Ռոմեո և Ջուլիետ» ներկայացման փորձերին (բեմադրիչ՝ Ջոն Բլոնդել, ԱՄՆ), ինչպես նաև բեմում փորձարկել իրենց ձայնային հնարավորությունները:
ԿԳՄՍ նախարարի տեղակալ Դանիել Դանիելյանը զրուցել է աշակերտների հետ, հետաքրքրվել՝ ինչ նախասիրություններ ունեն, ինչ ներկայացումներ են դիտել և այլն:
Աշակերտները վստահեցրել են, որ տպավորված են շրջայցով. ըստ նրանց՝ մի բան է լինել հանդիսատես՝ հետևելով ներկայացմանը, այլ բան է ծանոթանալ մինչև բեմ հասնելու ընթացքին:
«Թատերական շաբաթ» ծրագիրը կտևի մինչև մարտի 29-ը:
