Վանաձորի Հովհաննես Աբելյանի անվան պետական դրամատիկական թատրոնում մարտի 24-ին տեղի կունենա «Մկների ժողովը» մանկական ներկայացման առաջնախաղը՝ ըստ Աթաբեկ Խնկոյանի համանուն ստեղծագործության։
Բեմադրության, բեմականացման և ձևավորման հեղինակն է Գյումրիից հրավիրված ռեժիսոր Ասպրամ Բաղդասարյանը, որը ներկայացմանը հաղորդել է թատերական ինքնատիպ լեզու և գունեղ արտահայտչականություն։
«Մկների ժողովը» ներկայացման առանցքում բարոյական և դաստիարակչական կարևոր գաղափարներ են՝ համախմբվածության ուժը, փոխադարձ հոգատարությունն ու հանդուրժողականությունը, միմյանց հանդեպ սերը և վստահությունը։ Պատմությունը երեխաներին մատուցվում է հասկանալի, կենդանի ու ներգրավող ձևով։ Բեմադրությունն առանձնանում է երաժշտական ու բեմադրական հարուստ լուծումներով, դինամիկ գործողությամբ և վառ կերպարներով:
«Մկների ժողովը» ոչ միայն զվարճալի և հումորով լի ներկայացում է, այլև արժեքային ուղերձներով հագեցած թատերական փորձառություն, որը նպաստում է երեխաների գեղագիտական ճաշակի ձևավորմանը և մարդասիրական կարևոր գաղափարների ընկալմանը։