Այսօր՝ հունվարի 29-ին, լրանում է հայ անվանի օպերային երգիչ (տենոր) և բեմադրիչ, ՀԽՍՀ ժողովրդական արտիստ, Լիտվայի ԽՍՀ վաստակավոր արտիստ Գեղամ Գրիգորյանի ծննդյան 75-ամյակը:
Հոբելյանի առթիվ ՀՀ կրթության, գիտության, մշակույթի և սպորտի նախարարի տեղակալ Դանիել Դանիելյանը, Ա. Սպենդիարյանի անվան օպերայի և բալետի ազգային ակադեմիական թատրոնի տնօրեն Կարեն Դուրգարյանը, մաեստրոյի ընտանքի անդամները, թատրոնի անձնակազմի ներկայացուցիչները և արտիստները, մտավորականներ, գրիգորյանական արվեստի երկրպագուներ այցելել են Կոմիտասի անվան զբոսայգու պանթեոն, ծաղիկներ խոնարհել Գեղամ Գրիգորյանի շիրիմին և հարգանքի տուրք մատուցել անվանի արվեստագետի հիշատակին:
Դանիել Դանիելյանը զրուցել է երգչի ընտանիքի անդամների, գործընկերների հետ: Նա անդրադարձել է մաեստրոյի կյանքին ու գործունեությանը՝ ընդգծելով հայկական կատարողական արվեստում նրա ավանդն ու ներդրումը. «Գեղամ Գրիգորյանը երգել է աշխարհի բազմաթիվ խոշոր օպերային թատրոններում ու համերգասրահներում։ Մաեստրոն օպերային արվեստում իր արժեքներն է ստեղծել ու գրեթե կես դար աշխարհին մատուցել լավագույն դերերգեր և նրբազգաց կատարումներ»:
«Գեղամ Գրիգորյանը ոչ միայն մեծ արվեստագետ էր, այլև մարդ, ով միշտ հավատացել է երիտասարդներին։ Գեղամ Գրիգորյանի համար սերնդափոխությունը գաղափար չէր, այլ կարևոր նախապայման: Նա լսում էր, աջակցում, վստահում և ճանապարհ բացում նոր ձայների առաջ, և այսօր այստեղ են իր օրոք հիմնադրված Օպերայի Երիտասարդական ծրագրի արտիստները, որոնք իրավամբ մեծ արվեստագետի ժառանգության կրողն են»,- ասել է Ա. Սպենդիարյանի անվան օպերայի և բալետի ազգային ակադեմիական թատրոնի տնօրեն Կարեն Դուրգարյանը:
Նրա արտահայտիչ, յուրահատուկ և հզոր տեմբրով անզուգական ձայնը, բազմերանգ ու ինքնատիպ արտիստական հմայքը գրավել են աշխարհի ունկնդիրների սիրտը՝ նրան դասելով համաշխարհային մեծությունների շարքում։ Գեղամ Գրիգորյանի անունը սեպագրվել է 20-րդ դարի 40 լավագույն տենորների շարքում:
«Բոլոր ժամանակների տենոր», «Աստվածատուր երգիչ», «Ժամանակակից մեծագույն տենորներից մեկը». այսպես են բնութագրել միջազգային քննադատներն ու երաժիշտները Գեղամ Գրիգորյանին:
Հայաստանի օպերայի և բալետի թատրոնը տարվա ընթացքում մշակութային տարբեր ծրագրերով և ներկայացումներով կնշանավորի մեծանուն արտիստի հոբելյանը:
