Կայացել է մարդկանց թրաֆիքինգի և շահագործման դեմ պայքարի լուսաբանման ամենամյա լրագրողական մրցանակաբաշխությունը:
Մրցանակաբաշխության նպատակն է խրախուսել ՀՀ-ում մարդկանց թրաֆիքինգի և շահագործման դեմ պայքարի բազմակողմանի, օբյեկտիվ և արդյունավետ լուսաբանումը՝ դրանով իսկ նպաստելով երևույթի կանխարգելմանն ուղղված ազգաբնակչության իրազեկվածության մակարդակի բարձրացմանը:
Ողջունելով ներկաներին՝ ԿԳՄՍՆ երիտասարդության հարցերի վարչության պետ Զարա Ասլանյանը շնորհակալություն է հայտնել միջոցառման մասնակիցներին ցուցաբերած սրտացավության և թրաֆիքինգի մասին լայն իրազեկում իրականացնելու պատրաստակամության համար` խնդրի լուսաբանումը կարևորելով հնարավոր դեպքերի կանխարգելման և թրաֆիքինգի վտանգների մասին տեղեկացվածության բարձրացման տեսանկյունից:
«Կառավարոթյունը տարբեր ուղղություններով բազմաթիվ ծրագրեր է իրականացնում թրաֆիքինգի կանխարգելման նպատակով, այդուհանդերձ, դեռ շատ անելիք ունենք: Վերջերս ընդունված «Երիտասարդական քաղաքականության մասին» ՀՀ օրենքում ամրագրված է տեղական ինքնակառավարման մարմիններում երիտասարդական աշխատողի հաստիք ունենալու պահանջը: Մեր հեռահար նպատակն է, որ վերջիններս իրենց գործունեության շրջանակում հանդես գան նաև թրաֆիքինգի մասին իրազեկման աշխատանքով՝ այդպիսով ևս մեկ քայլ մոտենալով կանխարգելման նպատակին»,- ասել է ԿԳՄՍՆ ներկայացուցիչը։
Նա մրցույթի կայացման գործում ընդգծել է նաև փորձագիտական հանձնաժողովի անաչառ և հետևողական աշխատանքը` շնորհակալություն հայտնելով դրանում ընդգրկված տարբեր կառույցների մասնագետներին, փորձագետներին և քաղհասարակության ներկայացուցիչներին:
2025 թվականին մրցանակաբաշխությունն իրականացվել է ՀՀ կրթության, գիտության, մշակույթի և սպորտի, ՀՀ աշխատանքի և սոցիալական հարցերի նախարարների համատեղ հրամանով հաստատված «Մարդկանց թրաֆիքինգի և շահագործման դեմ պայքարի լուսաբանման ամենամյա լրագրողական մրցանակաբաշխության կանոնակարգի» համաձայն:
Մարդկանց թրաֆիքինգի և շահագործման դեմ պայքարի լուսաբանման ամենամյա լրագրողական մրցանակաբաշխությունն անցկացվում է հետևյալ անվանակարգերով՝ հեռուստա/ռադիո արտադրանք, տպագիր և էլեկտրոնային նյութեր:
2025 թվականին ներկայացվել է 7 հայտ, որից 2-ը՝ «Տպագիր և էլեկտրոնային նյութեր» անվանակարգում, 5-ը՝ «Հեռուստա/ռադիո արտադրանք» անվանակարգում:
Մրցանակաբաշխության փորձագետների գնահատման արդյունքում «Տպագիր և էլեկտրոնային նյութեր» անվանակարգի հաղթողներն են՝
- 3-րդ կարգի մրցանակ՝ Սոնա Մարտիրոսյան, «Հիմա եմ հասկանում՝ ինչ է կատարվել ինձ հետ. թրաֆիքինգի դեպքերը Հայաստանում»:
«Հեռուստա/ռադիո արտադրանք» անվանակարգի հաղթողներն են՝
- 1-ին կարգի մրցանակ՝ Ամալյա Պապյան, «Ամուսինը փախավ, կինը մնաց դժոխքում»
- 2-րդ կարգի մրցանակ՝ Լիանա Խաչատուրյան, «Մարդը փայտով էր խփում, կնիկը քացով. մի թրաֆիքինգի պատմություն»
- 3-րդ կարգի մրցանակ՝ Նաիրի Մուրադյան, «Սպիտակ ստրկության զոհերը. Հայաստանում թրաֆիքինգի դեպքերն ավելացել են»:
Մրցանակաբաշխության արդյունքում հաղթող հայտերը ստացել են դրամական խրախուսում՝
1-ին տեղի համար՝ 300 հարյուր հազար ՀՀ դրամ
2-րդ տեղի համար՝ 250 հազար ՀՀ դրամ
3-րդ տեղի համար՝ 200 հազար ՀՀ դրամ:
