Կրթության ոլորտում ծառայությունների դիմաց եկամտային հարկից վերադարձի հնարավորություններն ընդլայնվել են:
Հայտարարագիր լրացնող քաղաքացիներն այսուհետ կարող են ներքոնշյալ ուղղություններով գործունեություն ծավալող կազմակերպություններին կատարած վճարումների համար ստանալ եկամտային հարկի վերադարձ՝ տարեկան առավելագույնը 100 հազար դրամի չափով` բացառապես անկանխիկ եղանակով կատարված ուսման վճարների դիմաց: Համապատասխան կազմակերպությունների և ծրագրերի ցանկը հասանելի են ԿԳՄՍ նախարարության կայքում`
- մանկապարտեզներ,
- դպրոցներ,
- քոլեջներ և ուսումնարաններ,
- բուհեր,
- արտադպրոցական հաստատություններ,
- ոչ ֆորմալ կրթական ծրագրեր իրականացնող հաստատություններ:
Ստուգելու համար՝ արդյոք արտադպրոցական կամ ոչ ֆորմալ կրթական ծրագիրը, որից օգտվել եք, ԿԳՄՍ նախարարության կողմից երաշխավորված է, այցելեք ԿԳՄՍՆ կայքի (www.escs.am) «Սոցիալական կրեդիտ» բաժին և ծանոթացեք երաշխավորված ծրագրերին։ Ցանկերը պարբերաբար լրացվում են՝ նոր երաշխավորվող ծրագրերին զուգընթաց։
Հիշեցնում ենք, որ արտադպրոցական հաստատությունները՝ երաժշտական, արվեստի, գեղարվեստի դպրոցները և մարզադպրոցները լրացուցիչ երաշխավորման կարիք չունեն: Այսինքն՝ եթե Ձեր երեխան հաճախում է որևէ արտադպրոցական հաստատություն, և Դուք դրա դիմաց վճարել եք անկանխիկ եղանակով, արդեն իսկ կարող եք դիմել սոցիալական կրեդիտի համար։
Եկամտային հարկից վերադարձի հնարավորությունը գործում է նաև 2024 թվականին մատուցված ծառայությունների համար. ծրագրերի երաշխավորված լինելու հանգամանքը 2024 թվականի հաշվետու տարվա մասով դիտարկվելու է հայտարարագիրը ներկայացնելու օրվա դրությամբ, իսկ հետագա հաշվետու տարիների մասով՝ կրթական ծառայությունները մատուցող անձի կողմից հաշվարկային փաստաթղթի դուրսգրման ամսաթվի դրությամբ:
Սոցիալական կրեդիտի համար դիմելու կանոնները հրապարակված են Պետական եկամուտների կոմիտեի կայքում: