ՀՀ Կոտայքի մարզի Աբովյան քաղաքի գեղարվեստի դպրոցի «ՀԱՅելիցներ» թիմի պատրաստած «Գեղարդ» տեսանյութը հաղթող է ճանաչվել «Եվրոպական ժառանգության երիտասարդ կերտողներ» համաեվրոպական մրցույթում: Հայաստանը ներկայացնող դպրոցականների թիմը սեպտեմբերին կմեկնի Ստրասբուրգ պարգևատրման արարողությանը մասնակցնելու և այլ երկրների հաղթող պատանիների հետ ծանոթանալու համար։
«ՀԱՅելիցներ» թիմի պատրաստած «Գեղարդ» տեսանյութը հաղթող էր ճանաչվել նաև համաեվրոպական մրցույթի հայաստանյան փուլում, որը կազմակերպվել էր ՀՀ ԿԳՄՍ նախարարության համակարգմամբ՝ Ե․ Չարենցի անվան գրականության և արվեստի թանգարանի հետ համատեղ:
Մրցույթն ուղղված է պատմամշակութային ժառանգության հանրահռչակմանը և իրականացվել է «Եվրոպական ժառանգության օրեր» ծրագրի շրջանակում:
Հայաստանը մրցույթին ներկայացել է 11-17 տարիքային խմբում։ Մրցույթում ներկայացվել էր 41 աշխատանք. պատանեկան խմբերն ու անհատները մրցել են ազգային ժառանգության մասին իրենց պատկերացումներով՝ ներկայացնելով տեսասահիկներ, կոմիքսներ, անիմացիոն սյուժեներ, նկարչական աշխատանքներ, մինչև 5 րոպե տևողությամբ տեսանյութեր։
Հայաստանից և արտերկրից 21 հայազգի մշակույթի գործիչներից կազմված հանձնաժողովի գնահատման արդյունքում հաղթող էր ճանաչվել «Աբովյան քաղաքի գեղարվեստի դպրոց» ՀՈԱԿ-ը ներկայացնող «ՀԱՅելիցներ» թիմը՝ «Գեղարդ» տեսանյութով: Հայաստանյան փուլի հաղթողը մասնակցել է համաեվրոպական մրցույթին, որին այս տարի մասնակցում էին նաև Իտալիայի, Ֆինլանդիայի, Մոնտենեգրոյի, Լեհաստանի, Սլովենիայի, Իսպանիայի, Հյուսիսային Մակեդոնիայի և Ուկրաինայի թիմերը:
Մայիսի 9-ին Եվրոպական ժառանգության օրերի պաշտոնական կայքում հրապարակվել են հաղթողները՝ https://tinyurl.com/34de83bv: