«Դպրոցական լավագույն մինի այգի» երրորդ մրցույթն ավարտվել է Լոռու մարզի Նեղոց գյուղի Արթուր Բեգջանյանի անվան հիմնական դպրոցում տեղի ունեցած մրցանակաբաշխության հանդիսավոր արարողությամբ։ Մրցույթն իրականացվել է ՀՀ կրթության, գիտության, մշակույթի և սպորտի նախարարության, ՄԱԿ-ի Պարենի համաշխարհային ծրագրի, Ռուսաստանի ճյուղային սննդի ինստիտուտի և «Դպրոցական սնունդ և երեխաների բարեկեցություն» հիմնարկի կողմից:
Միջոցառման ընթացքում ամփոփվել են մրցույթի արդյունքները, պարգևատրվել են հաղթողները, կարևորվել են մասնակիցների հետևողական ջանքերն իրենց այգիների մշակման գործում։ Մարտից մինչև նոյեմբեր Հայաստանի տարբեր մարզերում դպրոցականները ջանասիրաբար մշակել են իրենց դպրոցներին կից հիմնված փոքր այգիները՝ ուսուցիչների, տնօրենների, ծնողների և համայնքների օժանդակությամբ։ Մրցույթին մասնակցել է 10 մարզի 20 դպրոց՝ ներկայացնելով իրենց իրականացրած նախագծերը։
Հանձնաժողովի մանրակրկիտ դիտարկումից ու գնահատումից հետո Նեղոցի հիմնական դպրոցն արժանացել է մրցույթի հաղթողի կոչմանը և դարձել մրցանակաբաշխության հյուրընկալողը: Երկրորդ տեղը գրավել է Գեղարքունիք գյուղի միջնակարգ դպրոցը, իսկ պատվավոր երրորդ հորիզոնականը զբաղեցրել է Լոռու մարզի Վանաձոր քաղաքի Ծովակալ Իսակովի անվան թիվ 23 հիմնական դպրոցը: Եռյակին հաջորդել են Սյունիքի մարզի Սիսիան քաղաքի թիվ 2 հիմնական և Կոտայքի մարզի Մեղրաձոր գյուղի Հ. Հակոբյանի անվան միջնակարգ դպրոցները՝ զբաղեցնելով չորրորդ ու հինգերորդ տեղերը։
Մրցանակաբաշխության արարողությունը հյուրաշատ էր՝ մասնակից դպրոցներ, մրցույթի կազմակերպիչներ, հանձնաժողովի անդամներ և, իհարկե, օրվա գլխավոր հերոսները՝ երեխաները։
ԴՍԵԲ հիմնարկի ղեկավար Սաթենիկ Մկրտչյանը, ՄԱԿ-ի Պարենի համաշխարհային ծրագրի ՊՀԾ ծրագրերի ղեկավար Մարիա Մուրադյանը և Ճյուղային սննդի ինստիտուտի ներկայացուցիչ Օկսանա Զոտովան, ողջունելով մասնակիցներին, շեշտել են մրցույթի կարևորությունը երեխաների համար՝ գնալու իրենց երազանքի հետևից ու քրտնաջան աշխատանքով այն իրականություն դարձնելու։
Մրցույթում առաջին տեղը զբաղեցրած դպրոցը պարգևատրվել է 3000 ԱՄՆ դոլարին համարժեք դրամի դրամաշնորհով, երկրորդը՝ չիր պատրատող սարքավորումով, երրորդը՝ սառցարանով։ 4-րդ և 5-րդ տեղերը զբաղեցրած դպրոցները ստացել են կաթսաների և դանակների հավաքածուներ։ Դպրոցների տնօրենները պարգևատրվել են հավաստագրերով։ Մասնակցության հավաստագրերը վիրտուալ տարբերակով կուղարկվեն նաև մասնակից բոլոր դպրոցներին։
Մրցույթի փուլերից մեկում դպրոցները տարրական դասարաններում անցկացրել են նկարչական մրցույթ՝ «Իմ երազանքի այգին» թեմայով։ Հենց այդ նկարներից ոգեշնչված՝ դպրոցները մշակել էին իրենց մինի այգիները։ Ցուցահանդեսը, որտեղ ներկայացված էին երեխաների 20 բացառիկ նկարները, ամփոփիչ միջացառման ևս մեկ կարևոր իրադարձություն էր։ Մասնակից դպրոցների պատանի նկարիչները կպարգևատրվեն «Երազանքի բանջարանոց» սեղանի խաղով։
Մրցանակաբաշխության արարողության ընթացքում տեղի է ունեցել հաղթող դպրոցների մինի այգիների նախագծերի շնորհանդեսը։ Միջոցառումն ավարտվել է Նեղոցի հիմնական դպրոցի տարրական դասարանների աշակերտների բերքահավաքի տոնակատարությունը խորհրդանշող ներկայացումով։ Այնուհետև երեխաները հյուրերին հրավիրել են այգեգործության թեմայով վիկտորինայի, որն ինքնուրույն պատրաստել էին բջջային հավելվածի միջոցով:
Մրցույթը «Դպրոցական սնունդ» ծրագրի բաղադրիչն է, որի նպատակն է նպաստել դպրոցական այգիների ստեղծմանն ամբողջ Հայաստանում, դպրոցական սննդի համար թարմ բանջարեղեն և կանաչի մատակարարել, ինչպես նաև երեխաների մոտ վաղ տարիքից հետաքրքրություն առաջացնել օրգանական գյուղատնտեսության նկատմամբ, նրանց սովորեցնել հողը մշակելու հիմունքները:
Այս տարի ևս մրցույթը դարձավ հիանալի հարթակ դպրոցների համար՝ ցույց տալու իրենց ստեղծարարությունը, նորարարությունը և նվիրվածությունը կայուն գյուղատնտեսության և առողջ սնվելու սովորությունների մասին իրազեկման գործում:
