ՀՀ ԿԳՄՍ նախարարի տեղակալ Դանիել Դանիելյանն այցելել է Ա. Սպենդիարյանի անվան օպերայի և բալետի ազգային ակադեմիական թատրոն և Գեղագիտության ազգային կենտրոն:

Դանիել Դանիելյանը Օպերայի և բալետի ազգային ակադեմիական թատրոնի նորանշանակ տնօրեն Կարեն Դուրգարյանի ուղեկցությամբ շրջայց է կատարել կառույցում, ծանոթացել գործունեությանը, եղել փորձասրահներում:

Կարեն Դուրգարյանը տեղեկացրել է, որ առաջիկայում նախատեսվում է բեմադրել Պ. Չայկովսկու «Կարապի լիճ» բալետային ներկայացումը, որը ոլորտում շրջադարձային է լինելու, ինչպես նաև միջազգային հարթակներում նախատեսվում է ներկայացնել «Արշակ» օպերան:

Նախարարի տեղակալը կարևորել է թե՛ հայկական մշակույթը օտարերկրյա բեմերում հանրահռչակելը, թե՛ Հայաստանում միջազգային ճանաչում ունեցող կատարողներին ընդունելը: Նա ուրախալի է համարել այն փաստը, որ օպերային արվեստով հետաքրքրված են նաև Սփյուռքում ապրող մեր հայրենակիցները, որոնք օպերային թատրոնի ներկայացումներում հանդես են գալիս որպես կատարողներ:

ԿԳՄՍ նախարարի տեղակալի հաջորդ այցելությունը Գեղագիտության ազգային կենտրոն էր: ԳԱԿ տնօրեն Վահան Բադալյանը փոխնախարարին ներկայացրել է կենտրոնի գործունեությունը, վերջին երեք տարիների ընթացքում կատարված աշխատանքը, տեղական և միջազգային նախագծերը, քննարկվել են ընթացիկ աշխատանքները։ Դանիել Դանիելյանը Վահան Բադալյանի ուղեկցությամբ այցելել է ԳԱԿ թանգարան և պատկերասրահ, ծանոթացել մշտական և ժամանակավոր ցուցադրություններին։ Նա այցելել է նաև ԳԱԿ փոքր թատրոն և հանդիպել թատրոնի ստուդիայում սովորող երեխաների հետ։ Դանիել Դանիելյանը կարևորել է կենտրոնի աշխատանքը՝ հատկապես մանկահասակ երեխաներին վաղ տարիքից արվեստին հաղորդակից դարձնելու և հետաքրքրություն սերմանելու առումով:

Հաջորդիվ ծանոթության նպատակով ԿԳՄՍ նախարարի տեղակալն այցելել է նաև Հայաստանի ազգային ֆիլհարմոնիկ նվագախումբ և Ժողովրդական երաժշտության և պարի ազգային կենտրոն:

«Արամ Խաչատրյան» համերգասրահում մեծ թափով հիմնանորոգման աշխատանքներ են ընթանում: Ամբողջությամբ վերականգնվում են (ռեստավրացիա) համերգասրահի նստատեղերը, արդեն իսկ ավարտվել են համերգասրահի պարտերի նստատեղերի ռեստավրացիոն աշխատանքները: Հղկվում է մանրահատակը, ինչպես նաև ճեմասրահի և շենքի այլ հատվածների մարմարե հատակը: Վերականգնվում են շենքի պատուհաններն ու դռները, կատարվում են հարդարման աշխատանքներ: ԿԳՄՍ նախարարի տեղակալ Դանիել Դանիելյանը հատկապես կարևորել է այն հանգամանքը, որ հենաշարժողական խնդիրներ ունեցողների և տարեցների կարիքներից ելնելով՝ տեղադրվել է վերելակ, և վերջիններիս կարիքներին համապատասխան՝ հիմնանորոգվել են նաև սանհանգույցները:

Ժողովրդական երաժշտության և պարի ազգային կենտրոնը, որը նոր է ստեղծվել, ներառում է ժողովրդական արվեստի՝ երգի, երաժշտության և պարի ոլորտները: Դանիել Դանիելյանի խոսքով՝ ԿԳՄՍ նախարարությունը պատրաստակամ է աջակցելու նորաստեղծ մշակութային հաստատությանը՝ պահպանելու և հանրահռչակելու ժողովրդական արվեստը: Քննարկվել են նաև առկա խնդիրները, նախանշվել են դրանց լուծման ուղիները: