Գիտելիքի և դպրության օրվա կապակցությամբ ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանն այցելել է Երևանի Գ. Գյուլբենկյանի անվան թիվ 190 ավագ և Աշտարակ համայնքի Օհանավանի Ս. Ավետիսյանի անվան միջնակարգ դպրոցներ, ինչպես նաև Շառլ Ազնավուրի անվան մշակույթի և արվեստի պետական քոլեջ:
Արաքսիա Սվաջյանը Երևանի թիվ 190 ավագ դպրոցի ուսուցիչներին, աշակերտներին ու ծնողներին շնորհավորել է Գիտելիքի և դպրության օրվա կապակցությամբ՝ մաղթելով արդյունավետ և բեղմնավոր ուսումնական տարի. «Սիրելի՛ աշակերտներ, դպրոցական տարիները մեծ ազդեցություն են ունենում ձեր հետագա կյանքի վրա: Հատկապես հիմա, երբ ավագ դպրոցում եք, ձեր կյանքի ամենակարևոր շրջափուլն է, և դուք պետք է կողմնորոշվեք ապագա մասնագիտության ընտրության հարցում: Պետք է ողջ ուժերը և ջանքերը ներդնեք՝ ձեր երազանքներն իրականացնելու համար»:
Նախարարի տեղակալն առանձնահատուկ շնորհավորել է տասներորդցիներին, որոնք հայտնվել են նոր միջավայրում և դեռ հարմարվելու փուլում են. «Սիրելինե՛րս, օգտագործեք առիթը և ամբողջ կյանքի համար նոր ընկերներ ձեռք բերեք»:
Արաքսիա Սվաջյանն այնուհետև գովասանագրեր է հանձնել ավագ դպրոցի 25 աշակերտների:
Գ. Գյուլբենկյանի անվան թիվ 190 ավագ դպրոցը Երևանի 16 ավագ դպրոցներից մեկն է, որտեղ այս սեպտեմբերից մեկնարկել է «Արհեստական բանականության (ԱԲ) սերունդ» փորձարարական կրթական ծրագիրը, որի շրջանակում բացվել է երկու դասարան: Ծրագիրը մշակվել է ՀՀ կրթության, գիտության, մշակույթի և սպորտի նախարարության աջակցությամբ՝ Հայաստանի գիտության և տեխնոլոգիաների հիմնադրամի (FAST) կողմից:
Տոնական տրամադրություն էր նաև Աշտարակ համայնքի Օհանավանի Ս. Ավետիսյանի անվան միջնակարգ դպրոցի բակում: Հիմնանորոգումից հետո դպրոցն իր դռներն է բացել կրթօջախում սովորող շուրջ 361 աշակերտի առջև, որոնցից 36-ն առաջին դասարանցի են: Դպրոցը վերակառուցվել է ՀՀ կառավարության և Ասիական զարգացման բանկի կողմից իրականացվող դպրոցների «Սեյսմիկ անվտանգության բարելավման ծրագրի» շրջանակում: 2021 թվականին մեկնարկած ծրագիրն ավարտվել է այս տարվա օգոստոսին:
Արաքսիա Սվաջյանը մասնակցել է դպրոցի պաշտոնական բացման արարողությանը, շրջել վերակառուցված դպրոցում, ծանոթացել իրականացված աշխատանքներին, տեխնիկապես և գույքով հագեցված նոր պայմաններին: Այսուհետ դպրոցի աշակերտները բնագիտական առարկաները կուսումնասիրեն ժամանակակից միջոցներով կահավորված լաբորատորիաներում:
Նախարարի տեղակալը շնորհավորել է աշակերտներին նոր ուսումնական տարվա կապակցությամբ և կոչ արել լավ սովորել, սիրել և խնամքով վերաբերվել սեփական կրթօջախին:
Օհանավանի Ս. Ավետիսյանի անվան միջնակարգ դպրոցի տնօրեն Նարինե Միսակյանը վստահեցրել է՝ ստեղծված նոր, անվտանգ ու հարմարավետ պայմանները լիարժեք կնպաստեն կրթօջախի հետագա գործունեության բարելավմանը:
Աշակերտները վստահեցրել են, որ նոր պայմաններում ավելի լավ են սովորելու, իսկ առաջին դասարանցի Դավիթը, որը նոր է հաճախում դպրոց, մեծ ուրախությամբ ասում է. «Եկել եմ դպրոց՝ հայերենի տառեր, թվեր ու հետաքրքիր շատ բաներ սովորելու»:
ԿԳՄՍ նախարարի տեղակալ Արաքսիա Սվաջյանն Գիտելիքի օրվա շրջանակում այցելել է նաև Շառլ Ազնավուրի անվան մշակույթի և արվեստի պետական քոլեջ: Նա շնորհավորել է քոլեջի սաներին, շրջել ուսհաստատության տարածքում, ծանոթացել շենքային պայմաններին:
«Ձեր քոլեջում ստեղծված է մի միջավայր, որտեղ յուրաքանչյուր սովորող վայելում է իր ուսանողական տարիները՝ ձեռք բերելով հիմնարար գիտելիքներ, մասնագիտական հմտություններ ու կարողություններ»,- նշել է նախարարի տեղակալը՝ մաղթելով խաղաղ ու ձեռքբերումներով լի տարի:
