ՄԱԿ-ի բնակչության հիմնադրամի, ՄԱԿ-ի կրթական, գիտական և մշակութային կազմակերպության, ՄԱԿ-ի մանկական հիմնադրամի, Պարենի համաշխարհային ծրագրի և Առողջապահության համաշխարհային կազմակերպության աջակցությամբ մեկնարկել է «Առողջ ապրելակերպ» պարտադիր խմբակի մենթորների 6-օրյա վերապատրաստումը:
Երկու փուլով անցկացվող վերապատրաստմանը մասնակցելու է Երևանի և մարզերի ավելի քան 100 մենթոր, որոնք ընտրվել են մրցութային կարգով դիմած 500 հայտատուից։ Առաջին փուլն իրականացվել է օգոստոսի 21-24-ը. 2-րդ փուլն անցկացվելու է սեպտեմբերի 22-23-ը։
Մրցույթն անցկացվել է հարցազրույցի միջոցով:
Մենթորների վերապատրաստման հիմնական թեմաներն են՝
- սնուցում և ֆիզիկական ակտիվություն,
- աճ, զարգացում, հիգիենա,
- անվտանգություն, վտանգի կանխարգելում,
- հոգեկան, հուզական և սոցիալական առողջություն,
- փոխհարաբերություններ, սեռային խնդիրներ,
- վնասակար սովորություններ, վարքագծային հիվանդություններ,
- բռնություն, հալածանք, շահագործում,
- սեռական և վերարտադրողական առողջություն:
Հանրակրթության նոր չափորոշչի համաձայն՝ «Առողջ ապրելակերպ» պարտադիր խմբակն իրականացվում է հանրակրթական ուսումնական հաստատությունների 5-11-րդ դասարաններում:
«Առողջ ապրելակերպ» դասընթացի նպատակն է աշակերտին սովորեցնել գնահատել իր և այլոց առողջությունը՝ որպես կարևորագույն արժեք, ինչպես նաև ձևավորել գիտելիքների, կարողությունների, հմտությունների և արժեքների վրա հիմնված անվտանգ վարքագիծ:
