Կրթության համաշխարհային համաժողովին մասնակցելու նպատակով Լոնդոն կատարած այցի շրջանակում ՀՀ ԿԳՄՍ նախարար Ժաննա Անդրեասյանն ու նախարարի տեղակալ Արաքսիա Սվաջյանն այցելել են բարձրագույն և միջին մասնագիտական ուսումնական հաստատություներ: Նրանք հանդիպել են Լոնդոնի համալսարանի, Լոնդոնի արվեստի համալսարանի, Վեստմինստերի քոլեջի ղեկավար կազմի ներկայացուցիչների հետ, ծանոթացել բրիտանական ուսումնական հաստատությունների կրթական ծրագրերին և ենթակառուցվածքներին:

Հանդիպումների ընթացքում քննարկվել են համագործակցության հեռանկարները, անդրադարձ է եղել ակադեմիական քաղաքների ստեղծման և կառավարման, կրթական կլաստերների հիմնադրման գործընթացում կիրառված վարչական լուծումներին վերաբերող հարցերի:

ԿԳՄՍ նախարարը մասնավորապես հետաքրքվել է Արվեստի համալսարանի գործունեության բրիտանական փորձով՝ նշելով, որ ՀՀ-ում ներկայումս քննարկվում է Ակադեմիական քաղաքի ստեղծման հարցը, որտեղ նախատեսվում է հիմնել նաև արվեստների կլաստեր: Ժաննա Անդրեասյանն այս համատեքստում կարևորել է արվեստի կրթության արդյունավետ կազմակերպումը՝ ընդգծելով ուսումնական ծրագրերի և ենթակառուցվածքների բարելավման անհրաժեշտությունը:

Վեստմինստերի քոլեջ այցելության ընթացքում ներկայացվել է արվեստի ոլորտի համար տեխնիկական մասնագետների պատրաստման ուսումնական գործընթացը, որը դիտարկվում է արվեստների կրթական կլաստերի շրջանակում: Կողմերը շեշտել են նաև միջբուհական կապերի զարգացման, ինչպես նաև միջին մասնագիտական կրթության աստիճանում համագործակացության անհրաժեշտությունը:

Հիշեցնենք, որ Լոնդոն այցի շրջանակում ԿԳՄՍ նախարարն ու տեղակալը հանդիպում են ունեցել նաև Մեծ Բրիտանիայի և Հյուսիսային Իռլանդիայի Միացյալ Թագավորության դպրոցների հարցերով պետնախարար Նիկ Գիբի (Nick Gibb, Minister of State for Schools) հետ։

Նախարարն այցելել է նաև Բրիտանական թանգարան՝ դիտելու «Շքեղություն և ուժ Պարսկաստանից Հունաստան» խորագրով ցուցահանդեսը:

Ժաննա Անդրեասյանը Լոնդոնում տեղի ունեցող Կրթության համաշխարհային համաժողովի ընթացքում հանդես է եկել ելույթով:

«Ի՞նչ քայլեր կարող ենք կամ պետք է ձեռնարկենք կրթության ոլորտում առաջնորդություն զարգացնելու համար՝ յուրաքանչյուր մակարդակում: Ղեկավարության ո՞ր տեսակներն են լավագույնս աշխատում» խորագրով պանելային նիստում՝ նախարարն անդրադարձել է կրթության կազմակերպման գործում առաջնորդության խնդրին:

«Կրթության հիմքում ընկած են սովորողների առաջնորդական կարողությունների ուսուցումն ու կատարելագործումը՝ որպես քաղաքացիական կրթության կարևոր բաղադրիչներից մեկը: Մենք գտնվում ենք ուսումնական ծրագրերի բարեփոխումների գործընթացում. գրեթե երկու ուսումնական տարի փորձարկելով Հանրակրթության նոր չափորոշիչը՝ տեսնում ենք, որ արտադասարանական գործունեությունը, այդ թվում՝ ուժեղ քաղաքացիական բաղադրիչ ունեցող նախագծերը, աճել են ավելի քան 100 տոկոսով՝ համեմատած նախափորձարկման ժամանակահատվածի հետ: Մենք պետք է հասկանանք, որ մեր երեխաներն ավելի ու ավելի են սովորում դպրոցից դուրս, և պետք է դպրոցները բաց ուսումնական միջավայր դարձնենք, որպեսզի դրանք ոչ թե մրցեն երեխայի կրթության այլ ձևերի հետ, այլ լրացնեն միմյանց»,- իր խոսքում նշել է նախարարը՝ հավելելով, որ ՀՀ դպրոցներում ներդրվում է կրեդիտային համակարգ, որը թույլ կտա դպրոցներում ստացած կրեդիտները դիտարկել նաև բարձրագույն և մասնագիտական կրթության համար:

Որպես արտաուսումնական ծրագրերի հաջողված օրինակներ՝ նա խոսել է «Թումո» կենտրոնների և «Արմաթ» ինժեներական լաբորատորիաների մասին: Նախարարն անդրադարձել է նաև մեդիագրագիտության կարողությունների զարգացման, ուսուցիչների մասնագիտական ազատության և տնօրենների գործունեության արդյունավետության մասին: Նախարարը նաև շեշտել է, որ, կրթական համակարգին անհրաժեշտ են այնպիսի ուսուցիչներ և տնօրեններ, որոնք հանդես են գալիս որպես առաջնորդներ:

«Սա նշանակում է, առաջին հերթին, վստահություն ստեղծել կրթության հիմնական դերակատարների նկատմամբ՝ նրանց մանկավարժական ինքնավարություն տալով՝ իրականացնելու այն նախագծերը, որոնք անհրաժեշտ են համարում արդյունքների հասնելու համար: Ինքնավար դպրոցները և ազատ ուսուցիչները պարտադիր անհրաժեշտություն են ստեղծագործական ուսումնական միջավայր ստեղծելու համար»,- ասել է Ժաննա Անդրեասյանը՝ այս համատեքստում ներկայացնելով ՀՀ հանրակրթական ոլորտի փոփոխությունների հիմնական ուղղությունները:

Ամփոփելով ելույթը՝ ԿԳՄՍ նախարարն ընդգծել է՝ կրթության ոլորտում առաջնորդ լինել՝ նշանակում է երբեք չդադարել ինքնակրթվել. «Որպեսզի մեր երեխաները ավելի լավ կրթություն ստանան, մեզ պետք են ավելի լավ աշխարհ, ավելի լավ ժողովրդավարություն և մարդու իրավունքներ»,- եզրափակել է նա:

Կրթության համաշխարհային համաժողովն անցկացվում էր «Ուսուցման մշակույթի զարգացում ավելի լավ և կայուն կրթություն ձևավորելու նպատակով ուսուցման մշակույթի զարգացում, ճկունություն, և խթանում» խորագրի ներքո, որին մասնակցել են ավելի քան 118 երկրի կրթության ոլորտի ղեկավարներ, ընդհանուր առմամբ՝ շուրջ 1000 պատվիրակ ամբողջ աշխարհից: