ՀՀ ԿԳՄՍ նախարարի տեղակալ Արթուր Մարտիրոսյանը մասնակցել և բացման խոսքով հանդես է եկել «Մեդիա և տեղեկատվական գրագիտության քաղաքականության և ռազմավարության վերաբերյալ ազգային խորհրդատվություն» ծրագրի շրջանակում այսօր տեղի ունեցած համաժողովին։
Միջոցառմանը մասնակցել են ՀՀ պետական գերատեսչությունների տեղեկատվական ծառայությունների ներկայացուցիչներ, լրագրողներ և տարբեր բուհերի ժուռնալիստիկայի ֆակուլտետների բարձր կուրսերի ուսանողներ:
Միջոցառմանը բացման ելույթներով հանդես են եկել նաև արտաքին գործերի նախարարի տեղակալ Վահե Գևորգյանը և ԵԱՀԿ մամուլի ազատության հարցերով ներկայացուցիչ Թերեզա Ռիբեյրոն։ Հանդիպման մասնակիցներին տեսակապով ողջունել է ՅՈՒՆԵՍԿՕ-ի գլխավոր տնօրենի՝ հաղորդակցության և տեղեկատվության գծով տեղակալ Թաուֆիկ Ջելասին։
ԿԳՄՍ նախարարի տեղակալ Արթուր Մարտիրոսյանը ողջունելի է համարել, որ համաժողովին մասնակցում են մեծ թվով երիտասարդներ, ինչը վկայում է, որ մեդիագրագիտության խնդրի՝ ապագա սերնդի կողմից գիտակցումը բարձր է։
«Գրագետ, տեղեկացված և ազատ հասարակություն ունենալը ենթադրում է նման գիտելիքներ, հմտություններ, արժեք և վերաբերմունք ունեցող քաղաքացու առկայություն, և այդ ամենի հիմքը կրթությունն է։ Եվ այս առումով հատկապես վերջին տարիներին իրականացվում է հսկայական աշխատանք, և առկա է մեդիագրագիտության խնդրի հստակ գիտակցում։ Մասնավորապես Կառավարության ծրագրում ամրագրված է, որ հանրակրթության ոլորտում պետք է բարելավվի մեդիագրագիտության մակարդակը»,- նշել է նախարարի տեղակալը:
Նրա խոսքով` նախադպրոցական կրթության պետական նոր չափորոշչում ընդգծված է թվային և մեդիա կարողունակության ձևավորման կարևորությունը, իսկ հանրակրթության պետական նոր չափորոշչով և առարկայական չափորոշիչներով նախատեսվում է ինտեգրել մեդիագրագիտությունը դպրոցական տարբեր առարկաների ծրագրերում, այն դարձնել կրթության բաղադրիչ՝ տարբեր թեմաների մեջ ներառելով քննադատական մտածողության, աղբյուրների ստուգման, մեդիա նյութերի ստեղծման, գործիքների կիրառության և այլ հմտություններ։
«Ներկայում Տավուշի մարզում փորձարկվող չափորոշիչներն առանձնանում են նրանով, որ գիտելիքին զուգահեռ՝ շեշտադրված է հմտությունների ձևավորումը, այդ թվում` ժողովրդավարական հասարակության անդամի համապատասխան հմտությունները, իսկ մեդիա և թվային գրագիտությունը ժողովրդավարության կենսունակության կարևոր բաղադրիչներից է»,- շեշտել է Արթուր Մարտիրոսյանը։
Նա նաև հավելել է, որ բուհական մասնագիտությունների ու որակավորումների ցանկում ներառված են «Մեդիաարվեստ» մասնագիտությունը, «Մեդիաարվեստ» և «Հեռուստամշակույթ» բակալավրի ու «Մուլտիմեդիա» մագիստրոսի կրթական ծրագրերը:
Փոխնախարարը տեղեկացրել է, որ «Հայաստանի Հանրապետության կրթության՝ մինչև 2030 թվականը զարգացման պետական ծրագրի» նախագծում, ի թիվս այլ թիրախների, ամրագրվել են թվային տեխնոլոգիաների շարունակական արդիականացման, մեդիագրագիտության մակարդակի բարձրացման, համապատասխան հմտությունների և կարողությունների ձևավորման կարևորությունն ու անհրաժեշտությունը:
Արթուր Մարտիրոսյանի խոսքով՝ համապատասխան գործընթացներ են իրականացվում նաև ոչ ֆորմալ կրթության ոլորտում։ Դեռևս 2017 թվականից ‹‹Մեդիա›› նախաձեռնությունների կենտրոնի հետ իրականացվում են ոչ ֆորմալ կրթության դասընթացներ։ Նախարարի տեղակալը նաև փաստել է, որ վերջին երկու տարիներին երիտասարդության և լրացուցիչ ու շարունակական կրթության ծրագրերի շրջանակում հայտարարվել են մեդիագրագիտության բարձրացման վերաբերյալ դրամաշնորհներ` ուղղված հատկապես մարզաբնակ երիտասարդների հմտությունների զարգացմանը։ Իր ելույթի ավարտին Արթուր Մարտիրոսյանը կարևորել է նմանօրինակ համաժողովների անցկացումը մեդիագրագիտության բարձրացման տեսանկյունից և ներկաներին մաղթել արդյունավետ աշխատանք։
Բացման ելույթներին հաջորդել են թեմատիկ քննարկումները, որոնք անցկացվել են հետևյալ խորագրերով՝ «Ապատեղեկատվությունը՝ ժամանակակից մարտահրավեր», «Ապատեղեկատվության դեմ պայքարը՝ արտակարգ իրավիճակներում» և «Ապատեղեկատվության դեմ պայքարի գործիքներն ու միջոցները»: Թեմատիկ քննարկումներին ելույթներով հանդես են եկել ոլորտի ճանաչված փորձագետները:
Նշենք, որ «Մեդիա և տեղեկատվական գրագիտության քաղաքականության և ռազմավարության վերաբերյալ ազգային խորհրդատվություն» ծրագիրը ՅՈՒՆԵՍԿՕ-ի ֆինանսավորմամբ իրականացնում է ՀՀ արտաքին գործերի նախարարությունը 2021-2022 թթ. մասնակցության ծրագրի շրջանակում։
