ՀՀ կրթության, գիտության, մշակույթի և սպորտի նախարարությունում այսօր տեղի է ունեցել հանրապետական ընդունող հանձնաժողովի նիստը, որին մասնակցել են ԿԳՄՍ նախարար Արայիկ Հարությունյանը, բարձրագույն ուսումնական հաստատությունների ռեկտորներ, նախարարության և Գնահատման և թեստավորման կենտրոնի ներկայացուցիչներ։ Նիստի ընթացքում քննարկվել են 2020-2021 թթ. ընդունելության քննությունների նախնական արդյունքները: Հանձնաժողովը որոշել է, որ Գնահատման և թեստավորման կենտրոնի ղեկավարությունը ընդունելության քննությունների արդյունքները պետք է ամփոփի և հրապարակի վաղը` հուլիսի 18-ին՝ ժամը 20:00-ին: Տեղեկացնենք նաև, որ հակահամաճարակային անվտանգությունից ելնելով, քննությունների արդյունքներն այս տարի հասանելի կլինեն բացառապես էլեկտրոնային տարբերակով, մասնավորապես՝ կուղարկվեն դիմորդների էլեկտրոնային հասցեներին, կտեղադրվեն dimord.am և բուհերի պաշտոնական կայքերում:
Հանրապետական ընդունող հանձնաժողովի նիստից հետո նախարարն ու ռեկտորները քննարկել են նոր ուսումնական տարվա կազմակերպմանն առնչվող հարցեր: